I ampe nitamakwarhisti ari semana, wenani 11 jurhiatikwa julio jimpo ka 15 jameri 2016.
Autor: Redacción
) 
Autor multimedia: Eduardo Alonso Estrada
I ampe nitamakwarhisti ari semana, wenani 11 jurhiatikwa julio jimpo ka 15 jameri 2016.
Axu Michoacán, ari semana, kurhantekwarhisti éska úpirinka p’etanhani José Manuel Mireles Valverde énka jintepk...
Axu Michoacán, ari semana, kurhantekwarhisti éska úpirinka p’etanhani José Manuel Mireles Valverde énka jintepk...
Autor multimedia: Eduardo Alonso Estrada
Axu Michoacán, ari semana, kurhantekwarhisti éska úpirinka p’etanhani José Manuel Mireles Valverde énka jintepka autodefensaecheeri orhets’ïkuti, nénka 2014 jimpotki ónkwarhitini jaka kataperakwarhu Hermosillo, Sonora. Inteeri kwáp’iri wantasïnti éska jánkwarhixaka éska jimpanhi kwáp’etarantskwa jimpo úaka went’ani, jimpoka arini jimpo Nuevo Sistema de Justicia Penal, jatsikwarhiani ka kánkwarhiani tiámu atap’etarakwa no jinteati k’éri k’amanharhinkwa.
Juevesï jimpo mítikwarhisti éska juez Uruapan anapu énka ixekuni jaka imeeri k’amanharhintskweechani no jeyapinhint’asti kwáp’itiiri wantakwani ka ísï jimpo no jurak’usti éska Mireles wént’apirinka ka wératini jameri kwáp’ikwarhini. Imeeri kwápiri wantasïnti éska ixesïnka éska PGR juezini jurhamukuska éska Mirelesï no wérapirinka. Ka ístu Diputado Movimiento Ciudadano anapu, Daniel Moncada ka Comisión Estatal de Derechos Humanos wantasïntiksï éska no p’etanhaska política jimpo.
Secretario de la Función Pública, Virgilio Andrade, jurhasti Michoacán ka wétenakusti tánkwarhikwani 36 Conferencia Nacional de Mejora Regulatoria, jimini kurhamarhistiksï ka wantasti éska i jimpanhi juramukwa Sistema Nacional Anticorrupción jarhoawati Secretaría de la Función Públicani ka ístu Auditoria Superior de la Federaciónini sési ixeixetani yámintu orhets’ïkutiichani ka juramutiichani énka tuminu íntsïnhajka, ka énka no sési xanhataaka tuminuni ónhatarhkwarhini.
Virgilio Andrade, wantasti éska yámintu Estadoechani ixekuaxatiksï tuminueri ánchitakwa, ka wantasti éska ixu Michoacán nótki ampe k’amarhusïnka ánchikwarhikwa jimanka ixenhani jaka nena tuminuni no sési úraskiksï juramuticha énkaksï wémukunt’aka ya.
Mítitarpinhasti éska ima tumpi énka jupikanhapka ka wantanhapka éska imanha wántikuaspka tsimani yurhitskiriichani énka warhimitini ixenhant’apka Morelia, Presa Cointzio anapu, jurhakunhasti ya.
No ústiksï xarhatakuni Inte tumpininha Israel, éska inte wántikwaspka yurhitskiriichani. Juramuti Fiscal arhikata wantaspti éskanha placa ma ixenhant’aspka jima énka yurhitskiriicha xarhant’apka ka imani jimpo wékanksï k’amanharhitant’ani, k’o peru ima placa t’íni tsïnchispti 10 mayo jimpotki. Magistrado Séptima Sala Penal anapu wantasti éska inteni jimpok’u Israel no út’i xarhataminhani éska inte ísï atawaska yurhitskiriichani, jimpoka yásï jameri no ústiksï terokunt’ani káni, nani ka ampe jimpo no sési úkwarhipi.
CNTErhu anapu jorhenkwarhiricha antankutastiksï ya tsimani kutsï énkaksï anhaxutaka ánchikwarhiteempani. Secretaria de Educación wantasïnti éska k’amarhuska ya, ari ma wéxurhini jorhenkwa 2015-2016, ka ístu wantasti éska yámintu ampe sési jarhaska ka éska yámintu jorhenkwarhiriicha íntsinhant’aaka sïranteecha educación básicaeri.
Ka wantastit’u éska jurhiatikweecha k’amarhuska ya, énka mil 620 jorhentpiriicha úpirinka wantakwarhini ampe jimpo no nípiksï ánchikwarhini ka inteni jimpo kwáp’ikwarhinhani ka nóksï chutanhani, yásï jameri tanimu ciento jorhentpiriicha sïranta íntspiant’astiksï kwáp’itaranksï
Jini México xanhatanhaxati tánkorhekweecha ka pakatperakweecha énka orhets’ïkuni jakaksï CNTE ka gobierno federal. Secretario de Educación Pública, Aurelio Nuño wantasti éska sési jákunt’aakaksï jorhentpiriicheeri ts’ek’ukwa, i jintesti k’éri ma astakwa reforma eductivaeri. Ístu wantasti éska ante semana énka jurhani jaka xarhatanhaati jimpanhi modelo educativo ka ístu wantasti éska wekasïnka CNTEni jinkoni márku ánchikwarhini ka wantontskwarhinksï.
Ari semana jini Veracruz, Congreso jima anapu, pakatperanhasti éska 7 mil kw’iripu úakaksï íntsinhani ánchikwarhita basificación arhikata, diputadoecha PAN anapucha no sési korhokasti éska gobernador Javier Duarte ísï kurhakw’arhika.
Jueves jimpo jini Niza énka Francia jaka, yápuru ísï kurhakwarhint’asti, jimpoki ma achaati k’éri ma mótsitarakwa wiriastaparini atach’akuasti wáni wáni kw’iripuni. Viernes jameri mítikwarhisti éska 84 kw’iripu warhiska, 10 jintesptiksï tataka ka nanaka sapiicha, ka éskanha 148 kw’iripu atakata jarhaska ka 52 kw’iripu atakata sánoksï warhixatinha, ísï jimpo úpirinti sánteru wáneni warhiriicha.
Miguel García TinocoCuanajo, jinteesti kwanasïo jucha anapu jimpo |
Derechos Reservados
© Notivideo
© Notivideo