Resumen semanal purhépecha del 18 al 22 de Julio 2016
Autor: Redacción
) 
Autor multimedia: Erik Sánchez García
Resumen semanal purhépecha del 18 al 22 de Julio 2016
Ari semana énka k’amarani jaka i ampe nitamakwarhisti, wénani t’émpini yúmu tanimu jurhiatikwa julio jimpo ka ma ekwatsi ka....
Ari semana énka k’amarani jaka i ampe nitamakwarhisti, wénani t’émpini yúmu tanimu jurhiatikwa julio jimpo ka ma ekwatsi ka....
Autor multimedia: Erik Sánchez García
Ari semana énka k’amarani jaka i ampe nitamakwarhisti, wénani t’émpini yúmu tanimu jurhiatikwa julio jimpo ka ma ekwatsi ka tsimani jameri 2016 jimpo.
Morelia Michoacán, i semana CNTE anapuecha bancoechani míkastiksï jimpoka no jiákutasïnka gobiernoni éska jorhentpiriicha tarjeta jimpo mayemunt’aaka, amposï kw’iripu nónhati úpti tuminu petani ka tuminu incharani ampe.
Presidente Cámara Nacional de Autotransporte (CANAPAT), Arcadio Méndez Hurtado, wantasti éska wáninha millón tuminu tsïtaxatiksï jimpoka jorhentpiriicha jupiawaska ma ciento ka terok’ani mótsitarakwa autobús arhikata, ka kurhakuasti jurhamutiichani éskaksï ánchikwarhiaka ka juramuakaksï ka nóteru jiákutawaka éska ménteru kurhirant’awaka mótsitarakweechani.
Nák’iru gobierno Michoacán anapu jánkwarhipka ewak’uant’ani autobusiichani, tanimu mótsitarakweecha kurhirawastiksï jini San Juan Tumbio énka jinteka municipio Pátzcuaro jimpo. Jima jorhentpiriicha CNTE anapuecha míkatini jatsiaspti xanharuechani ka ístu treniiri xanharu, ka mamaru ireta anapuechanha jarhuawaxantiksï.
21 julio jimpo, Jorhentpiriicha ménteru tánkwarhistiksï secretaría de Gobernaciónini jinkoni ka wantontskwarhixatiksï nena p’akatperanhani reforma educativaeri ampe. Nájki wantontskwarhinhani jaka ya, jorhentpiriicha mámaru ampe úxati yápuru ísï, éska xanharu míkani, bancoechani ók’utani ka trenini xanharu míkakuni, íni ampe úparini wékasïntiksï éska yámintu jorhentpiriicha jarhuawaka winhaperani íni kurhakw’arhikwani ka no ísku jurhak’unhani.
Jorhentpiriicha CNTE anapuecha ísï míkakuparini jarhani xanharu trenini jimini Morelia, no sési úkusïnti ánchikwarhikwani ka meyapikwani, jimpoka mámaru ampe no úsïnti nierani ka janoni ixu ka yawani ísï Puerto Lazaro Cárdenas wératini.
Gobernador Silvano Aureoles niraspti Janitzio ánchikwarhikwa xanhatani ka énka na k’amakupka ya jorhentpiriicha CNTE anapuecha no sési arhistiksï ka wékani atanksï jameri. Tátsikwa Gobernador wantasti éska Michoacánini nóksï úati jorhentpiriicha CNTE anapuecha juramukuni.
Presidente México anapu, Enrique Peña Nieto, kurhakwarhisti éska puaminhant’aaka “Casa Blancani” jimpo énka wáni tuminu jimpo piápka, jimpokanha juramutiicha gobiernoeri ánchikwarhiriicha wétarhisïnka éskaksï jurhimpiti ka kaxumikwa jinkoni ánchikwarhiakaksï.
Arit’u semana erakunhasti Alejandra Barralesïni nénka orhets’ïkuaka Partido de la Revolución Democráticani, ka nóksï yámintu perredistaecha sési jeyapinhint’asti, jimpoka wantanhasïnka éska no jurhimpiti erakunhaska.
Jini Tierra Blanca Veracruz, Pedro Tamayo Rosas, 45 wéxurhini jatiri énka ánchikwarhiripka ayempikweecharhu, chenempao jamukutini wantikunhasti tiámu atarakwa jimpo ka erap’ant’astksï tempa ka tsimani wáp’eecha. Tamayo Rosas jamaxanti xarhatap’eni atap’erakweeri ka no sési úriicheri ampe imani ireta jimpo. Arini estadoni jimpo wántikuastiksï ya t’émpeni yúmu tsimani ayempikwa ánchikwarhiriichani íni juramukwani jimpo énka Durte orhets’ïkuni jaka.
Sánteru yawani ísï, jini Turquía, ejército jima anapu wékasptiksï juramutini presidente Recep Tayyip Erdogan jarhontani golpe de estado jimpo, k’o peru kw’iripu winhaperasti ka kwáp’int’asti, ísï jimpo jima jupiperanhasti ka warhiperanhani ka wantanhasïnti éska warhinaska 265 kw’iripu, 104 kw’iripunha ejército anapuechaspti ka 47 presidenteeri kwápiriicha.
Tátsikwa Erdogan kw’iripuni ayenkuni éska nóksï úska jarhontatani ka sésimintu arhiasti éska ts’ïma énka ísï wékani japka manatani jukari no sési mayeampiati.
Melania Trump énka jinteka Donald Trump témpa nénka erakunhaka éska candidato partido republicano jimpo, arhinharhikustiksï éskanha Michelle Obamani wantakwa sïpatakuska, ka Melania wantasti éskanha no ísïïska, késkinha ima wantakwa imeeriiska.
Derechos Reservados
© Notivideo
© Notivideo