Ari semana i ampe úkwarhisti, wénani 8 jurhiakwa agosto jimpo ka 12 jurhiatikwa agosto 2016 jameri.
Autor: Redacción
) 
Autor multimedia: Especial
Ari semana i ampe úkwarhisti, wénani 8 jurhiakwa agosto jimpo ka 12 jurhiatikwa agosto 2016 jameri.
Axu Michoacán ari semana, xanhatanhaxati ka ixenhaxati tsánpikwani presidente municipal Álvaro Obregón anapuni ka t’ámu...
Axu Michoacán ari semana, xanhatanhaxati ka ixenhaxati tsánpikwani presidente municipal Álvaro Obregón anapuni ka t’ámu...
Autor multimedia: Especial
Axu Michoacán ari semana, xanhatanhaxati ka ixenhaxati tsánpikwani presidente municipal Álvaro Obregón anapuni ka t’ámu policíaechani jimint’u anapu, Juez wantasti éska ts’ïmi k’amanharhintskwa jatsiskanha nénka t’émpini kw’iripu kurhirantskata ixenhant’apka jini municipio de Cuitzeo, ísï xarhatakuasti Fiscal.
Juez juramusti éska Inteechanha ónhakwarhitini jawati kataperakwarhu David Franco Rodríguez énka Morelia jaka, erokwarhiatiksï tsimani kutsï, énka jameri fiscal xarhataaka ka winhaperaaka inteecheeri tsámpikwani,
Diputadoecha Congreso local Michoacán anapuecha, erokaxatiksï éka juez wantaaka éki Juan Carlos Arreygue Núñez k’amanharhintskwa jatsiska ka nóteru úni kataperakwarhu wént’ani, énka ísï k’w’aniaka diputaduecha jatsiati tanimu kutsïk’u jameri ka erakunksï máteru ne máni énka juramuaka presidenciakwarhu.
Moreliat’unha i semana, tuminu sïpakustiksï Secretaría Política Socialiirini, t’animu kw’iripu jima ánchikwarhiriicha niraspti bancorhu tuminuni p’etant’ani, ts’ïminha tsimani millón peso p’etaspti ka jimasï sïpap’iriicha ewakwarhistiksï tuminuni ka mótsitarakwa ma. Juramutiicha wantasti éska mótsitarakwani ixenhant’aska sánteru tátsekwa ísï, jóperu tumininha nótki xarhant’asti.
Nájkiru CNTE anapu jorhentpiriicha Morelia kópikwarhu jakaksï, Secretaría Turismo Municipal anapu wantasti éska wáni kw’iripu junhaaka Morelia, wantasti éska erokanhaxaka 100 mil kw’iripu, ka ts’ïminha 300 millón peso antakwa jurak’ukustiksï íntspikwarhiriichani ka hoteleroechani wantanhasti éska i wéxurhini julio jimpo sánteru wáni kw’iripu junhaska kw’írkwarhini, sánteru ka no julio 2015 jimpo.
Yápuru México ísï kánikwa janixati. Jini Veracruz, puebla ka Hidalgo tormenta tropical Earlini jimpo wáni kw’iripu warhinhasti. 35 kw’iripu warhinhasti jini puebla ka máteru xáninha tsínchikata jarhastiksï; juramutiicha jamaxati jirhinhaant’ani jwáteecharhu ka kawaru jimpo. Ka Veracruzinha 13 kw’iripu warhinhasti, ka Hidalgo ma kw’iripunha warhisti ka ménkuni ma kw’iripu warhisti Morelos janikwani jimpo, xáninha jwáteecha ch’ampakwarhinhani. Nájki ixu Michoacán káni janini jaka, yáasï jameri no ma ampe nó sési úkwarhixati janikwa jimpo, jóperunha Protección Civil méntku ixexati namanka janhaskwarhini jaka janikwa.
Suprema Corte de Justicia de la Nación no jeyapinhint’asti amparoni énkaksï inchamutapaka 64 jorhentpiriicha kwap’ikwarhint’aparini éskaksï no úminhaaka Evaluación Docente. Ministroecha Primera Sala anapu wantastiksï éska sési jarhaska énka jorhentpiriicha úminhaaka tsék’utarakwa ka éskaksï k’o úaka chutanhani énka tanipuru jameri nóksï úska sési wérhukuni tsékukwarhu. Ministroecha wantasti éska wétarhisïnka tséperakwani sési únt’anksï ka ísï úatiksï ánchikwarhikwarhu pakaranksï.
México anapu Ch’anariicha énka nikaksï Juegos Olímpicoecharhu jini Brasil, yáasï jameri nótki ma antapikwa intsinhasïnti. Ch’anariicha nóksï ústi antani ka tsíp’astiksï arini chanakweechani jimpo énka jinteka clavadoecha, box, tiro con arco, fútbol ka máteru ch’anakweechani jimpo énkaksï úpirinka antani. Alfredo Castillo Cervantesini Conade orhets’ï, sésimintu wantatsistiksï jimpoka niraska ch’anariichani pámpiani Rio de Janerio ka xarhatanhasti éska jini Castillo Cervantes warhiti ma jinkoni jamaxata ka nónha ixeani jarhani ch’anariichani.
Jini Turquía, no k’amakwarhisïnti warhiperakwa, i semana tsimani mótsitarakweecha charap’astiksï jimanimintu énki nitamani jápkaksï policía mótsitarakweecha; Juramuti wantasti éska inteni ampe ísï úska imeecha énka wékanka jarhont’ani Presidente jima anapuni.
Red Fronteriza de Derechos Humanos táant’asti wáni kw’iripu énka México ka Estados Unidos irekanksï jaka ka yóni nóteru ixep’eranksï, tsïmi sésikwa intsïnhasti ka únksï ixep’eranhani Rio Bravo, jima énka kúnkwarhejka México ka Estados Unidos. Eratseparini turhisï jimpo abrazos no muros, inteni jimpo wékasïntiksï éska táateempeecha ixeawaka wap’eechani ka táate k’ériicha nimakweechani míteawaka jimpoka wáni kw’iripu jini antap’inustiksï ka nóteru mítiani chenipo anapuechani jimpoka jarharperanhaska énka Estados Unidos petant’awapka chutapariani ka nóteruksï úni márku irekani.
I semana teresimaristiksï tumpi Dan arhikatani Inglaterra anapu, jimpokanha inte tempunhani jurak’uspka nóteru wékani imani jinkoni jamani, ka pawantimakwanha mítini éskanha yurhitskiriiri amampa wáni millón antaspka lotería jimpo ka yurhitskirini wáni millón arhokukuni. Daneiri pampiriicha jukari teresimaristiksï jimpokanha ima xáni wáni tuminu tsitaka.
César Velázquez¿Miyuskiri ixu? | 
César VelázquezK´umanchikwa Cheran anapu | 
César VelázquezIxu Michoacánt´u mazahuaecha irekasti. |
César VelázquezNana k´ériicha, ch´anantskwa 2016 jimpo. | 
César VelázquezTata David Santos Cocucho anapu, amparhati wanankwa úasïnti | 
Miguel García TinocoCocucho anapu ánchikwarhikwa. |
Derechos Reservados
© Notivideo
© Notivideo