Resumen de noticias en Purépecha
Autor: Redacción
) 
Autor multimedia: Especial
Resumen de noticias en Purépecha
Yáasï i semana ari ampe nitamakwarhisti wénani 15 jurhiatikwa ka 19 jurhiakwa agosto 2016 jameri.
Yáasï i semana ari ampe nitamakwarhisti wénani 15 jurhiatikwa ka 19 jurhiakwa agosto 2016 jameri.
Autor multimedia: Especial
I semana jorhenkwarhiriicha normal anapuecha mámaru ampe ústiksï ka kurhirastiksï mótsitarakweechani, jimpoka juramuti federación anapuecha wantaska éska nóksï íntsawaka plaza automática, énkaksï kurhakw’arhini jaka.
Lunes jimpo, jima municipio Ecuandureo ísï énka parhikujka autopista de Occidente 36 jorhenkwarhiriicha jupikanhasti, jimpoka jamaxaantiksï míkani xanharuni ka kurhirastiksï mótsitarakwa ma, ka inchateru jimpo Morelia máteru tanimu kw’iripu jupiwastiksï ka juramukwarhu péeranksï.
Morelia, miércoles jimpo, juez de control juramusti éska 28 jorhenkwarhiriicha úati wéranksï ka jima játini kwapikwarhinhani, jóperuksï mayempiati 2 mil pesu, ka mántani tsïmani semana niwatiksï juramutiichani xarhakuani ka nonha úatiksï mótsini máteru nani irekani, ka nóteruksï úati normalistaechani jinkoni kúnkwarhini ka ni úatiksï antarherani kw’iripuni énkaksï no sési ampe úkuaka. Ts’ïminha xanharu míkaspti ka kw’iripunksï jupiatini jatsiani. Ka yúmu tanimu tumpiicha ménkuni ísï jamasptiksï ka támunha sïpasptiksï patrulla ma jimposï nóksï wérati jimpoka sánteruksï k’amanharhintskwa jatsiska.
Juez juramisti éska ts’ïmi tumpiicha énkaksï Morelia jupikawaka, ónkwarhitini p’akaraaka, énka jameri lunesïwaka ka ménteruksï pitarkwarhiani, jimaninha 144 hora antankurasïnti ísï éska na juramukata jaka k’éri juramukwarhu.
CNTE anapu jorhentpiriicha yápuru México anapu, tánkwarhikwa ma jimpo pakatperanhasti éskanha no uénaakaksï ánchikwarhini jorhentperakweecharhu lunes 22 agosto jimpo éska na juramukata jatsika SEP. Orhetiskutiicha magisterio anapuecha, tánkwarhinhastiksï i martes jimpo Gobernación, ka jima no ma ústiksï pakatperanhani juramuti federación anapuechani jinkoni, nájkirunha Oaxaca sección 59 wantaaka éska ts’ïmi k’oru inchant’aaka jorhentpekwarhu. Xu Michoacán magisterio anapu orhets’ïkuti ayentpisti éska na wantaaka pakatperani SEP anapuechani jinkoni.
Ixu México, i semana, kurhakwarhint’asti éska Joaquín Guzmán Loera wap’a Jesús Alfredo jupinhaska pánksï. Intenha jima jarhaspti t’irerhperakwa ma jimpo restaurante énka jaka Vallarta, énka inchapkaksï p’etaninha cártel Jalisco Nueva Generación anapuecha, ka máteru tanimu kw’iripu páwastiksï, ka yáasï jamerinha no ne ma wantasïnti mítini nani jakiksï.
Ist’u xarhatanhasti p’itakata ma jimpo fotografía arhikata, jima xarharasïnti Jesús Alfredo (Chapoeri wap’a) ka Kate del Castilloni jinkoni jarhani, wantanhasïnti eska Kate Chaponi jinkoni jámaska jimpokanha nípka imani p’orhepini éka ima sïpakorheni japka ka sésimintuksï juramutiicha jirinhantani jarhani. Kate amparu ma kurhak’urhesti ka ísï no nirani juramukwarhu. Juramutiicha Estados Unidos anapuecha wantasïnti éska exekutixaka José Alfredo mámaru ampe énka úpirinka k’amanharhitskwa jatsini ka ixu México, inte nonha ampe ma k’amanharhintskwa jatsini.
Juez ma ari semana juramusti éska Guzmán Loerani énka amparu ma inchamutapka kurhak’urhiparini éskaksï ménteru kw’anhaskunt’apirinka, k’ataperakwarhu Antiplano enka estado de México jaka, jimpoka móskunhaspti Cefereso énka Ciudad Juarez, jaka, Ka juez wantasti éskaksï úaka kw’anaskunt’ani jo peronha sano t’ámu kutsï jimpo jima paranhati.
Juegos Olimpicoecha jimpo, ch’anari México anapu Misael Rodríguez antasti ma antapikwa broceeri, ka wáni kw’iripu tsípinhasti. Paola espinoza énka clavado antapipka, erokasaantiksï éska intet’u antapinka, k’operu no ísï újti, tanimu kw’iripu antakustiksï. Yáasï ya erokanhaxati éska taekwondo ch’anhakwarhu úaka orhepani parhikuni.
Ístu María Guadalupe González, María del Rosario Espinoza ka German Sánchez antap’ikwa antastiksï teyapitiiri. Ka Ismael Hernández Antapikwa antasti bronceeri. María Guadalupe antapisti marcha jimpo, María del Rosario Taekwondo jimpo antapisti, German Sánchez antapisti clavado jimpo, ka Isamael Hernández Pentatlón jimpo antasti.
I semana jini Estados Unidos, Luisiana anapuecha no sési nitamakwarhistiksï janikwa jimpo, 13 (t’empini tanimu) kw’iripu warhinhastinha. Ka támu California no sési janhaskwarhixati xáni kurhup’ini ka nóksï úsïnti patani.
Méntku mámaru no sési ampe nitamakwarhixati Siria, jima Alepo énka distrito Qaterji jaka, bomba kw’anip’astiksï avioni jimpo, jimanimintu énka wáni kw’iripu inchateru jimpo wantatsekorheni nípkaksï. Yúmu tanimu kw’iripunha warhinhasti, yúmunha sapiichaspti ka wáni kw’iripunha atakata pakarasti, ísï éska na xarhatanhaka tataka sapi Omran, énka yurhiriterku jaka t’upuru janharhitini ka aponturhari yápuru parhakpinirhu ísï mítenhasti ka ikianhasti kómku ixenhani.
Derechos Reservados
© Notivideo
© Notivideo