I ampe úkwarhisti i semana, 22 ka 26 jurhiatikwa agosto 2016 jameri.

Ari semana wénapirinti jorhenkwa ciclo escolar 2016-2017 yápuru ísï México ka méntkuni axu Michoacán, jóperu no ísï ústi, jorhentpiriicha CNTE Michoacán anapuecha kúnkwarhistiksï Chiapas, Guerrero ka Oaxaca anapu jorhentpiriichani jinkoni ka márku nóksï jorhentpekwarhu inchant’ani ánchikwarhini. Nájki Secretaría de Educación en el Estado (SEE), wantaka éski sánonha 97 por ciento, 12 (t’émpini tsimani) mil jorhempekwa jimpo ánchikwarhinhaxati, ka támu ísï CNTE wantasïnti éskanha nó ísïiska 87 por ciento jonrhentpekwa jimpo nónha ánchikwarhinhaxati.

Kántski 15 jurhiatikwa agosto jimpo, 8 jorhenkwarhiriicha jupikanhasptiksï Ecuandureo, ka juramutiicha ónhawastiksï jimpokanha ts’ïmi sïpaspka ka támunha kw’iripu jupiani, ka i semana yápuru anapu ireteecha tánkwarhint’asti ka kurhakwarhinksï normalistaechani jinkoni, éska ts’ïmi jorhenkwarhiriicha petanhawaka.

Churikwa jimpo i miércoles, jini Aranza jimasï énka jinteka kilómetro 37 xanharu énka jinteka Carapan-Uruapan, mótsitarakwa ma kurhirastiksï autobús arhikata, yámintunha k’amap’isti. Juramutiicha wantasïnti, éskanha normal anapu jorhenkwarhiriicha ísï jamaska, jóperu támu ísï, jorhenkwarhiriicha wantasïnti éska ts’ïmi no ísï úska, no kurhirant’aska, ka wantasïntiksï éska ireteecha ísï jamani jati jorhenkwarhiriichani petarkwarhiani.

Ini ampe jimpo, autobús kankwarhiriicha, nóteruksï ánchikwarhiti, ka nóteruksï axati mótsitarakwa jinisï ka ni Tierra Caliente, ka kurhakustiksï juramutiichani éska ewap’iant’aaka sáno 200 mótsitarakwaeechani énka jupiatini jatsiaka normalisteecha mámapuru ireta jimpo.

Orhets’ïkuti Pedro Felipe Gurrola Ramírez, mando Especial Seguridad Michoacán anapueeri, wantasti éska juramutiicha estado ka federación anapuecha kwawaxatinha xanharuchani énkaksï Michoacán kúnkwarhijka Jalisco, Guanajuato ka Querétaro wénatini, jimpokanha yáasï jupiperaxatiksï cárteliicha ts’ïmi énka jinteka Jalisco Nueva Generación ka Pacíficoeri, jimpokanha Joaquín Guzmán Loeraeri wap’eechani, (El Chapo) jupiwaakaksï ka pánksï, ka ísï nóksï úni ínchakunksï ixu iretarhu nósï sési úriicha.

Ísï kwarhukuni jarhani xanharuechani, ´wekasïntiksï éska ts’ïmi cartel anapucha no janoakaksï Michoacán, jimpoka jinisï kétsekwa ísï káni no sési ampe nitamakwarhistiksï xáni jupiperani carteliicha plaza ewap’eranhani. Gurrola Ramírez wantant’asti éskanha 30 laboriatorio xereantaska jimini énka droga únhanka, ka istunha murutanhani inte itsutakwa marihuana arhiakata, ka ísïnha nó xáni no sési jantikwa jarhani.

Ari semanajtu jorhentpiriicha, ánchekorheriicha ka korhenkorhitiicha Universidad Intercultural indígena de Michoacán anapuecha, menteruksï juramutiichani kurhakorhexati éska jatsiaka ma rectorini énka jorhenatiwaka ka mítikuaka jima ánchikwarhini, éska na mítikwarhika UIIMrhu anapu ánchikwarhiriicha nóksï jiókasti jimpanhi rectorini énka gobernador jatsika, jimpokanha no kankwarhiasïnti sïranta jorhenakweri.

Juevesï jimpo xarhatanhasti ánchikwarhita ma, énka marhuawaka jorhentpini wantani p’urhepecha jimpo. Ari eranharitakwa ch’anakwa maesti ka mítinhasti es APP. Kw’iripu úati teléfono celular jimpo ka Tablet arhikata jimpo patsani ka jorhenkwarhini. APP “Ju sáni purépecha wantani”

Axu México, Servicio de Administración Tributaria (SAT), mítetarpisti éska yúmu gobernadoriichani ixekuaxakaksï namanka tuminu jatsikaksï, ixekuxatiksï Javier Duarte, Veracruz anapuni, ka César Duarte Chihuahua anapuni, Roberto Borge Quintana Roo anapuni ka énka jintepka gobernador Nuevo León anapu, Rodrigo Medina, énka ts’ampikunhaaka jimpoka kánikwa ampe jiakutaska ma mótsetarakwa úrichani énka intepka gobernado

Ocotlán, Jalisco, Profepa míkasti Parque Ecológico Metropolitano La Eucalera, jimpokanha tsípitiicha énka jima japka no sési jantikwarhu jarhasptiksï, juramutiicha Profepa anapuchanha 32 tsípitiichani jwátarhu anapuechani ewant’asti sési káni.

Ka yápuru parakpini jimpo, mámaru ampe nitamakwarhixati janikwa jimpo, ka ístu kurhakwarhint’asti éskanha máteru nani kurhupexatinha, ka támu jenchexati mámapuru ísï, Italia, Bangladesh, India, Birmania ka Tailandia, ka i semana warhinhastinha 200 kw’iripu. Jininha Amatrice, Italia, sánteru k’éri ma jinchestinha ka sánteru wáni warhinhasti ka k’uta ampe xamakwarhint’astiksï. Juramutiicha yáasï jamerinha nóksï wantaxati, nénka jaka México anapucha énka ampe úpirinka no sési úkwarhinchani jini Italia, jimpokanha ménku úntaxati jencheni.

Jini Colombia pakatperakwa ma karanhasti ka arhini jinkoni ka k’amakwarhisïnti warhiperakwa énka sáno tsimani ekwatsi ka témpini wéxurhini warhiperanhaaka, ka xáni yóni jimpo warhinhasti 220 mil kw’iripu. I karakatani jimpo ísï pakatperanhasti Fuerzas Revolucionarias de Colombia ka gobierno Colombia anapuni jinkoni, Naciones Unidas sési ixesti arini pakatperakwani, ka presidente Colombia anapu Juan Manuel Santos 2 jurhiakwa octubre jimpo, kurhamarhiati yámintu kw’iripuni éki jeyapinhint’ajka íni pakatperakwani.

FARC arini pakatperakwani jimpo, nóteru úati warhipeni jarhani ka yásï wénani kúnkwarhikwa politicaeri jintewatinha.

I ampe úkwarhisti i semana, 22 ka 26 jurhiatikwa agosto 2016 jameri.

Autor: Redacción

Autor multimedia: Especial

Autor multimedia: Especial