Resumen de noticias en Purépecha
Autor: Redacción
) 
Autor multimedia: Especial
Resumen de noticias en Purépecha
Ísï nitamakwarhisti ari semana wénani 24 jurhiakwa ka 30 jameri septiembre 2016.
Ísï nitamakwarhisti ari semana wénani 24 jurhiakwa ka 30 jameri septiembre 2016.
Autor multimedia: Especial
Michoacán, sábado 24 jurhiakwa septiembre jimpo mítikwarhispti éska tata cura José Alfredo López Guillén warhiri xarhant’aska apoakunt’ani imani iretani jimpo Las Guayabas, municipio Purundiro ísï, jimininha tiosï k’utani jimpo Iglesia de la Santísima Trinidad jintespti tata cura, ka intenha lunes 19 juhiakwa no xarhant’asaanti.
PGJE wantasti, éska xarhasïnka éska inte tata cura José Alfredoni, wantikunhaska tiámu atarakwa jimpo, no yóni jimpo énka énka tsinchipka ima jurhiatikwa 19 septiembre jimpo. Jini Puruandiro misa ampe úkunt’astiksï, ka méntkuni misa úkustiksï jini irieteemparhu Panindícuaro, tata curani tsinkunt’astiksï.
Martes 27 jurhiakwa, Michoacán jupiperastiksï juramutiicha ka jorhenkwarhiriicha normal anapuechani jinkoni, inteni jimpo polícieecha 48 jorhenkwarhiriichani jupikawastiksï jini Carapan, jimanha xanharu míkatini jatsisptiksï, ka jupiaxaptiksï mótsitarakweechani o jutarakwa ka jimat’u máru mótsitarakwa kurhiraastiksï.
Éska na mítikata japka ónkwarhitini jatsiasptiksï 48 jorhenkwarhiriichani, ka Jueves jimpo PGJE jueves jimpo p’etaasti 18 jorhenkwarhiriichani jimpokanha nóksï úspti xarhatakwani éska inteecha no sési ampe úspka. Máteru 30 (ma ekwatsi ka témpini) jorhenkwarhiriichani k’amanharhint’astiksï ka pawastiksï juez ma jinkoni ka jimat’u ts’ïmi ústi wérani mayampiparini, jóperunha wérakwa jatini kwáp’ekwarhiatiksï.
Universidad Michoacanarhu, útasï míkatini jatsisti jorhenkwarhiriicha énka wékani jakasï jimini inchani, ka rector Medardo Serna González jankwarhixati ya ts’ampikwa inchamutani, jimpoka de Ciudad Universitariani ka máteru jorhentpekweechani míkatini jatsiaska ka nónha ánchikwarhinhaxati yáasï jameri.
I Viernes jimpo 30 septiembre, Morelia, kw’ínchinhant’astiksï José María Morelos. Secretario de la Defensa Nacional, Salvador Cienfuegos Zepeda, jurhasti ka wantasti éskach’i jánkwarhint’aaka sési ánchikwarhini, jorhenkwarhini ka sési páp’eranch’i juchaari iretani jimpo ka jánhanharhiani juramukweechani. Wantastit’u éska mintsikaakaksï ejércitoni jimpoka ts’ïmi jarhasti pari juramukweechani jánhanhariani. Tátsikwa wanopekwa ampe jarhaspti, jorhenkwarhiriicha, ejercito ka máteru kw’iripuecha wanopisti Morelia.
Aris semana jupinhasti Vladimir Arzate Carbajalini nénka jintepka procurador de la Defensa el Menor en el DIF jini Sonora, intenha sïpakwarhixapti, jimpokanha mítikusptiksï éska inte charhaku ewakwarhiasaanka amapeechani ka tátsikwa atarakuant’ani kw’iripuechani énkaksï wékani jarhajka kánkwarhini charhaku ma. Yáasïnha ónkwarhitini jawati xásï no sési úkwa jimpo.
Ari semana jini Israel, warhisti ex presidente Shimon Peres, inte achamasï 93 jatirispti. Inte intsinhaspti Premio Nobel de la Paz, jimpoka sésimintu jánkwarhispti ánchikwarhini jarhuatpini éska Israel ka Palestina sési p’ap’erapirinksï. Wáni juramutiicha yápuru ísï anapuecha nirastiksï tsinkunt’ani shimon Peresini
Jini Noruega, Edward Snowden kurhakw’arhispti sésikwa ka úni nirani intsinhant’ani jánhanharhikwani libertad de expresióniirini, juramutiicha corterhu anapuecha nóksï sésikwa íntskusti ka jimposï no niwati.
Ari semana 26 jurhiakwa septiembre jimpo, Hillary Clinton ka Donald Trump kúperatastiksï ka jima wantaxent’astiksï na énkaksï eratsini jaka juramuni énka antapiakaksï juramutini Estados Unidos. Wantanhasïnti éska Hillary Clinton antakuska wantani Donald Trumpni, ka inte Donald Trump sánteru wantaxerasti Alicia Machadoni, jimpoka Hillary Clinton xarhatakuspka namanka no sési kánt’apka Aliciani éka jintepka miss universo.
Derechos Reservados
© Notivideo
© Notivideo