Resumen de noticias en Purépecha
Autor: Redacción
) 
Autor multimedia: Especial
Resumen de noticias en Purépecha
Iáasï i amape nitamakwarhisti ari semana wénani 10 octubre 2016 jimpo.
Iáasï i amape nitamakwarhisti ari semana wénani 10 octubre 2016 jimpo.
Autor multimedia: Especial
Uruapan Michoacán i semana, yápuru ísï xanharu míkwarhisti jimpokanha k’upanta ikaratiicha, k’upanta p’ikuriicha ka ts’a énka k’upantani sési jatsirant’ajka órhutawaska, jimpokanha kurhakwarhisïntiksï éska yámintuecha sési antakua intsïnhaka, éska sési mayemunhaka k’upanta jukanchati ka k’upanta p’ikurhiicha. Ts’ïmi ísï wantasïnti éska p’ipatiicha sánteru tuminu antakusïnka dólar jimpo, jimpokanha ts’ï México p’etatasïnka íntspikuarhini.
Juevesï jimpot’u jimini Uruapan, ménterusï xánharu míkasti jini enka jaka subdelegación PGReri, jimpoka Ejército Mexicano ka Policía Federal jupikawaaka 11 nósï útspiriichani én Viagraechani jinkoni kúnkuarhijka. Jimani énka jupiapkaksï ts’ïminha kámaxaanti tiámu atarakueechani, ka wantasptiksï éska fuerza rural anapuechaspka, inteni tánkuarhikua jimpo énka nóteru jaka ya.
Máru achaatiicha, nénka Viagraechani jinkoni kúnkuarhejka, p’etarkuarhiaparini ts’ïmini xanharu míkastiksï jimini énka jaka subdelegación PGRiri, kurhakuarhisïnti éska p’etanhaaka ts’ïmi achaaticha, jóperunha juramutiichani jinkoni íntsant’astiksï jimpoka ts’ï k’amanharhintskwa jatsika énka ísï kámani japkaksï tiámu atarakwa.
Yáasï jameri Policía Michoacán ka fuerzas federaliicha yápuru ísï jamaxati kwáni jarharani xanharuechani ka ixeni jarhani éska no órhutawaaka ka sánteru Uruapani ísï jorhenkwarhiriicha ka jorhentpiriicha, jimpoka ma semana jamastiksï ya kurhakw’arhini éska íntskuawakaksï becaeri tuminuni jimpoka nónha intsant’aska jorhenkwarhiriichani, ka jorhentpiriicha democrático arhikateecha, ts’ïmit’u weakujti winhachani jimpoka wékasïnti waxat’anhani juramukwa ma énka juramuaka marcha ka plantón arhikateeni.
Ari jueves ka Viernes jorhenkwarhiriicha ménteruksï xanharu jimpo jupiastiksï mótsitakueechani o jutarakuechani, yáasï jamerinha nóki mítikwarhisïnti námunisï jupiaski.
Policía Michoacán, jámaspti jimasï kwák’utani jorhenkwarhiriichani, ka nóksï sánteru nitaratarakua jupiani, ka ísï janhaskwarhiparini viernes jimpo, ts’ïmi autobusiischa nóteruksï nani weraspti nirani ka teroxutini ísï úntasptiksï ménteru weakunhani.
It’u semana UMSNHrhu, jupiperastiksï warhiperani jimini anapu jorhenkwarhiriicha ts’ïmani jinkoni énka míkatini jatsikaksï universidadini jini Facultad de Medicina, jimpoka sáno ma kutsï ka terok’ani míkurhitini jatsistiksï, ka jorhenkwarhiriicha jánkwarhixatiksï uékani ewap’int’ani ya ka nósï úsïnti, nájkirunha jorhenkwarhiriicha Lucio Cabaña anapuecha jarhontakwarhika, ka máteru jorhenkwarhiriicha jima pakarastiksï jorhenpekweecharhu énka ewapiant’akaksï ya.
José Martín Godoy Castro, procurador de Justicia, paroni jimpo wantasti, éska nóksï úaka juramuni éska jarhontatawakaksï ts’ïmini énka míkatini jatsika UMSNH, nájki rector jima anapu ísï kurhakw’arhika, Godoy Castro kurhakuasti jimini anapu juramutiichani éska jimpanhi juramukua sistema de justicia penal jimpo pakatperanhaaka.
Axu México, i semana Joaquín Guzmán Loera kwáp’iri, José Refugio Rodríguez, nirasti xarhakuani SEIDOni, jimpoka wantakwa xarhatapka internet jimpo, nénka Chapoeri wáp’eechani jimpo wantakuaapka, ka arhixaanti éska ts’ïmi no atawaspka jini Sinaloa 5 kw’iripu ejerciturhu anapuechani.
José Rodríguez, wantastit’u éska Joaquín Guzmánini no íntsant’awaka juramutiichani Estados Unidos anapuechani, nájki Renato Sales Herdia comisionando Nacional Seguridad anapu wantaaka éska axanhaaka enero o febrero jimpo.
Jini Veracruz, xáni no sési nitamakuarhinhani ka nósï jánhaskuarhini yápuru ísï, gobernador jima anapu Javier Duarte, sésikua kurhakw’arhisti ka kéntikuni sáni juramukua jimpo, ka Flavino Ríos jintewati nénka juramuni jawaka nénka jameri Javier Duarte no juramuni jawaka. Ka gobierno federalinha jamani jawati kwáni imani estadoeni jimpo.
Wantaminhant’ajti énka mítinhaka éska Bob Dylan íntsinhaka Premio Nobel Literaturaeri i wéxurhini 2016 jimpo, intenha kústatisti Estados Unidos anapu, ka antakusti kararini Japon anapueni Haruki Murakami, énka sánteru wantanhanka éska íntsinhapirinka inteni jánhanharitakuani.
Derechos Reservados
© Notivideo
© Notivideo