Mámaru ampe nitamakwarhisti i semana wénani 17 jurhiatikwa octubre 2016 jimpo.
Autor: Redacción
) 
Autor multimedia: Especial
Mámaru ampe nitamakwarhisti i semana wénani 17 jurhiatikwa octubre 2016 jimpo.
Universidad Michoacanarhu 52 jurhia no ánchikuarhinhasti ya, ka ari semana, ménteruksï jupiperanhasti jorhenkwarhiriicha jimini...
Universidad Michoacanarhu 52 jurhia no ánchikuarhinhasti ya, ka ari semana, ménteruksï jupiperanhasti jorhenkwarhiriicha jimini...
Autor multimedia: Especial
Universidad Michoacanarhu 52 jurhia no ánchikuarhinhasti ya, ka ari semana, ménteruksï jupiperanhasti jorhenkwarhiriicha jimini anapuecha ts’ïmini jinkoni CUL ka MAR anapuechani jinkoni, jorhenkuarhiriicha énka no úka inchani Universidadirhu, ts’ï míkatini jatsika universidadini paroni jimpo.
Jorhenkuarhiriicha, facultad medicina jorhentperakuarhu niérastiksï ka jima ts’akapu ka chúkari jimpo warhiperastiksï, nájki policía jámaspka kwák’utani máru jorhenkwarhiriicha atakata p’akarasti.
Martes jimpo wantanhaspti éska Universidad ampantint’apirinka, wéakunt’apirintinha jorhenkwarhiriicha casas de estudiantes anapuecha, ka nájki juramuti ka jorhenkwarhiriiicha UMSNH anapu nípi eweap’int’ani, 60 jorhenkwarhiriicha nónha wékastiksï universidadini intspint’ani, nóksï weákunt’asti ka nít’u rector Medardo Serna González wént’api jimanha rectoría pakarasti ima chúritki ka ústi rectoría ka Centro de Información, Arte y Cultura k’umanchikweechani ewap’iant’ani.
Jorhenkwarhiriicha UMSNH ménku jámaxatiksï jirinhakunt’ani na, na ewap’int’ani universidadini.
It’u semana, xu Morelia jorhenkwarhiriicha normalirhu anapuecha trenuni xanharu míkakustiksï kurhakw’arhiparini éska intsinhaaka ánchikwarhita plaza automática jimpo, jóperu policía jarhontatasti.
Inchamani ari semana, presidenciakwarhu Buenavista Tomatlani jimpo no sési nitamakwarhisti jimpoka niárakustiksï jima anapu juramutini Lorenzo Barajas ka atastiksï ampe ka jima yámintu ampe kw’anikustiksï no sési únksï. Jimininha 11 kw’iripu jupikanhasti íni ampe úrini. PGJE wantasïnti éska axawaspka ísï úni, inte no sési útspiri César Ochoa Mendoza énka arhinhajka El Morisqueto.
Axu Michoacán i semana, jurhasti presidente Enrique Peña Nieto, ka mítastinha inteni jimpanhi xanharuni autopista Cuitzeo- Pátzcuaro, énka 63 kilómetro yóparhiraaka, ka inte xanharunha 4 mil 300 millon peso jukaparharasti, jimininha úati xanharhu jatani Michoacán, Jalisco ka Guanajuato anapuecha, ka sánteru ts’ïmi énka k’éri móskutarakwa káwajka ka jimasï nitamanka Morelia ka Salamanca uéramani ísï, ka jimasï no úni jarhani wéakunhani. Enrique Peña Nieto wantasti, ka arhisti gobernadorini Silvano Aureoles Conejoni éska jarhoataka Michoacán tunimu jinkoni, nájkinha 2017 jimpo eranhaskwarhini jaka éska kwerataati tuminu.
México mítikwarhisti éska juez federal no sésikwa íntsaaska tsimani amparoechani énka inchamutapka Joaquín Guzmán Loera, no wékaparini éska axanhapirinka Estados Unidos, jimpoka jini corte Texas ka California anapu pitarhkwarhixatiksï, ísï jimpo juez jiák’utasti éska Chapo móskunhaati Norte ísï.
Gobernador Veracruz anapu Javier Duarteni, énka kurhakw’arhika licencia, yáasïnha jirinhaxaamptiksï, PGR i semana wantasti éska sïpakwarhixaampa jimpokanha jarhasti ma sïranta ya énka jupikatajka Javier Duarteni jimpokanha no sési útspiriichani jinkoni kúnkwarhisïnka, ka jatsiastinha tuminu ka mámamru ampe énka no xárharajka nani p’iraski ka jarhuatastinha tuminuni ampakerant’ani.
Wantanhasïnti éska Javier Duarte Canada ísï sïpakwarhiska, PGR kurhakusti Interpolini éska jarhoatapirinka jirinhant’ani yápuru ísï, jimposï wantakwa axakusti 190 paísiichani ka jarhuants’ï ixent’ani ka jupikani inteni achaatini.
Yápuru ísï kurhantekwarhisti, énka mítinhaka éska wantikunhaska juez federal ma, intenha ixekuaxaanti no sési útspiriicheeri ampe narcotráfico arikateecha éska na inteka Z40 ka El Chapo Guzmánirini, wáni juramutiicha kurhapint’astiksï ka ísï jimponha juzgado federaleecha sánteru kwátanhakata jawatiksï.
Estados Unidos i semana, ménteruksï kúperatasti Democratani Hillary Clinton ka republicanoni Donald Trump nénkaksï antakwekani jaka jinteni presedente inteni irieta jimpo, yáasï jánhaskatiicha wantasïnti éska ménteru wantakwa jupiperakwarhu Hillary antakuska Donald Trump, tátsikwa Donald wantasti éska no ma wantaaka énka inte antaska presidenteeni.
Tátsekua jimint’u Hillary Clinton wantap’asti pirerini Vicente Fernándezini énka pirekwa ma úkunt’aaka wantaparini éskaksï uinhaperaka latinoecha.
Axuani América Latina, no sési ixenhasti énka mítinhaka éska Lucía Pérez yurhitskiri ma 16 (tempini ka kuímu) jatiri Argentina Anapu, inteni droga íntskunhaspka ka t’atsikua yurhitskirini tsïp’anksï no sési kánt’ani ka xásï ya wantikunksï jini Mar del Plata. Yápuru ísï íni yurhitskirini jimpo na úkwarhinchaka Argentina anapuecha kurhakwarhisti éska nóteru wantikuaakaksï nanakeechani jiwakwarhiparinksï “ni una menos”. Ka axu México ka máteru nanit’u ménkuni kurhakw’arhinhasti éska nanakeecha jánhanharhinhaaka ka nóteru xáni atanhaakaksï.
Miguel García TinocoPawani pawani jánkwarhinhasïnti ánchikwarhini ka tsípikwarhinhani. | 
Miguel García TinocoPawani pawani jánkwarhinhasïnti ánchikwarhini ka tsípikwarhinhani. | 
Miguel García TinocoPawani pawani jánkwarhinhasïnti ánchikwarhini ka tsípikwarhinhani. |
Miguel García TinocoPawani pawani jánkwarhinhasïnti ánchikwarhini ka tsípikwarhinhani. | 
Miguel García TinocoPawani pawani jánkwarhinhasïnti ánchikwarhini ka tsípikwarhinhani. | 
Miguel García TinocoPawani pawani jánkwarhinhasïnti ánchikwarhini ka tsípikwarhinhani. |
Derechos Reservados
© Notivideo
© Notivideo