Resumen de noticias en Purépecha
Autor: Redacción
) 
Autor multimedia: Especial
Resumen de noticias en Purépecha
Ísï nitamakwarhisti i semana wénani 24 jurhiakwa octubre 2016 jimpo.
Ísï nitamakwarhisti i semana wénani 24 jurhiakwa octubre 2016 jimpo.
Autor multimedia: Especial
Ísï nitamakwarhisti i semana wénani 24 jurhiakwa octubre 2016 jimpo.
Ixu Michoacán wantanhasti éska jimini UMSNHrhu ari semana sánonha antakurhsïnti ya tsimani kutsï énka no ánchikwarhinhajka jimpoka míkatini jatsiska jorhenkwarhiriicha énka noksï úka inchani jimini, nájkinha rector ts’ïmiichani jinkoni wantontskwarhika ya ka mámaru ampe eyakuani, yáasï jameri nóksï úsïnti pákatperanhani ka jimposï 55 mil jorhenkwarhiriicha jimini anapu nóksï úni jati jimini niárani jorhenkwarhini.
Morelia wénakwarhisti 14 Festival Internacional de Cine Morelia anapu, ka mámaru kw’iripu jurhasti énka xarhatakweeri ampe ánchikwarhijka énka na jinteka actriz ka actoriicha xu México ka máteru nani anapuecha. Jurasti México anapu actor Demian Bichir, énka Oscarini janhanharhikwani wékankaksï íntskuni, jurhasti xarhatani ánchikwarhitani énka inte orhets’ïkujka éska director, ka Demian Bichir íntsinhasti jánhanharhikwa ma jimpoka yóni ísï sési ánchikwarhika ya, ka yámintu tuminuni énka íntsinhaka, íntskuasti táateempani jorhenkwarhiriicheeri énka Ayotzinapan normaliiri anapuecha no nanika, ka wáni kw’iripu sésimintu sési ixejti.
25 jurhiatikwa i kutsïiri, pirerini Juan Gabrielini miaminhant’astiksï jini Parácuaro Michoacán, ka nájki warhika ya, janhanharhikwa ma íntskunhant’asti Las Vegas Internacional Press Association, ka ewap’int’asti jerachiempa Pablo Aguilera Valadez. Ka Silvia Urquidi énka Juan Gabrielini jinkoni sési páp’eranka, wantasti késkinha yámintu ampe énka inte pirieri jatsikwarhipka, jurak’ukuska wáp’ani Ivánini énka márkuksï kánkwarhipka Silvia Salasïni jinkoni, ka máteru wápempeechani no ma jurak’ukuani.
Ka jueves jimpo, Morelia janostiksï 400 diputadoecha yápuru México anapuecha, ka tánkwarhinhastiksï ka úni inteni Conferencia Permanente de Congresos Locales, ísï jimpo wáni políciaecha kwáni japti jima énka kw’irhkwarhipkaksï diputaduecha ka jimat’u énka úkwarhipka tánkwarhikwa Centro de Convencionesïrhu, ka jimposï wantanhapti éska námunku policíaecha kwátani japinrika irietani xánku 25 policiecha ka nájki Secretaría de Seguridad Pública wantapi éski sésku jarhaspka policíecha énka kwáni japinrinka Morelia ka yápuru Michoacán jimpo.
I semana gobernadorini Veracruz anapuni, Javier Duarte énka, Partido Revolucionario Institucional anapupka sáno 21 wéxurhini, ixekustiksï namanka nitamakwarhini jaka ka p’etatanhant’astiksï ísï wantaparhini Comisión Nacional de Justicia Partidaria jimini partidoeri anapu, ka ts’ïminha erokaxapti ka nónha xarhakuaspti, jimpokanha yáasï éska na mítikwarhika sïpakwarhixampka.
Presidente México anapu Enrique Peña Nieto, axasti Senado de la República wantakwa ma, énka kurhakwarhijka móts’ïtani PGR orhets’ïkutini Arely Gómezini, ka jima niérani Raúl Cervantes i achaati íntsinhasti sésikwa i semana ya. Ka ísï jimpo táateempeecha 43 normalisteecheeri ayotzinapani anapuecha énka tsinchikata jakaksï, kurhakw’arhixatiksï éska ménku sési janhaskani jawakaksï ixeant’ani wáp’aeechani, jimpokanha Arely Gómez sési niátakuxapka jirinhant’aani.
Ka jini Venezuela, Congreso jima anapu juramusti éska presidenteni Nicolás Maduroni úkuakaksï jucio político, ísï winhats’ïtasti Asamblea Nacional Venezuela anapu, ka inteni jucio político jimpo ixekuatiksï nénka ampe ínte no sési ánchikwarhini jaka ka no jarhoani jarhani éska kw’iripueri sésikweecha jánhanharhinhaaka jimpokanha wáni kw’iripu kómu nitamakwarhixati. Ka pitarkwarhinhasti Nicolás Maduruni inte jurhiatikwa énka inchajka noviembre kutsï.
K’amarhuni jamani ari semana, jini Londres, kurhakwarhint’asti éskanha achaati Jimmy Newell, kwarhatsispka ka kwarhach’uni ka inteni jimposï warhini ima jurhiatikwamentu ka ima jántunhati énka antap’inupka 11 octubre jimpo teroxutini ísï, sésinha warhikwarhisti wap’itunha ják’i jupik’utini. Intenha Segunda Guerra Mundial nítispti ka 103 wexurhini jatirispti.
Derechos Reservados
© Notivideo
© Notivideo