Resumen de noticias en Purépecha
Autor: Redacción
) 
Autor multimedia: Especial
Resumen de noticias en Purépecha
Arisï nitamakwarhiskaksï i semana wénani 7 jurhiakwa ka 11 jurhitikwa noviembre 2016 jameri.
Arisï nitamakwarhiskaksï i semana wénani 7 jurhiakwa ka 11 jurhitikwa noviembre 2016 jameri.
Autor multimedia: Especial
Jueves jimpo jorhenkwarhiriicha normalirhu anapuecha, jupiperstiksï políciaechani jinkoni jini Las Guacamayas, Lázaro Cárdenas ísï, jima míkasptiksï treniiri xanharuni kurhakwarhiparini éskaksï íntsinhaaka ánchikwarhita plaza automática jimpo ka éska meyamunhaka jarhop’ekua beca arhikata.
Policíaecha mítakuekani treni xanharuni kw’anirasti gas lacrimógeno ka jorhenkwarhiriicha kwápikwarhinhani kw’anirasptiksï tsakapu ka ch’ukari ampe. Normalisteecha mótsitarakwa ma kurhirhastiksï. Ka Viernes jimpo nótki mítakwarhispti treniiri xanharu jimpoka jorhentpiriicha órhutaspka.
Universidad Michoacanarhu yáasï jameri nótki mítikwarhisïnti na xáni ampe xamatakwarhiski ka tsïp’ini inteni paroni jimpo, énka jorhenkwarhiriicha CUL anapuecha tsimani kutsï míkatini jatsipka inteni k’éri jorhentpekuani. Juramutiicha universidad anapuecha wantasti éska jorhenkwarhiriicha mayampiaka, sánhani pikurhukupani inteni tuminu jimpo énkaksï jarhoaperakwarhu intsinhajka casa de estudianteecharhu. Rector Medardo Serna wantastit’u éska i wéxurhini 2016, Universidad Michoacana no antankutaxaka tumina pari mayamuani jimini anapu ánchikwarhiriichani.
Ístunha SEE wétarhinchaxati mil millones peso ka ísï úni meyamuani jorhentpiriichani i wéxurhini.
Jini Ciudad de México, Guillermo Padrés Elías, énka jintepka gobernador Sonora anapu, nirasti jantiok’u xarhakuani jueziichani, ka énka wént’ani jamanka PGR jupikasti jimpokanha mámaru ampe no sési úska, eski tumina sïpani, tuminu imerakwarhini, ka juramutiicha Sonora anapuchanha jamaxati ixekuni nénka ampe inte kw’iripu jupiapka tumina ewakwarhiapani ka mámaru ampeteru no sési úkwa.
Ka Ístu Guillermo Padrés wáp’ani jupikastiksï, énka nípka PGRrhu táateempani kurhankwarhini ka jima jupikastiksï jimpoka intet’unha mámaru ampe no sési útsperiiska, ka ónhastiksï jini Cefereso El Altiplanorhu, ka táatempanksï ónhatakwarhistiksï Reclusorio Oriente CDMX.
PGR íntspixati 15 millon peso, némanka wantakwa íntspiaka, Javier Duarte de Ochoa ixent’akwekani, inte ústeru gobernadoristi jini Veracruz, inteni achaatini jirinhaxatiksï jimpokanha no sési útspiriichani jinkoni kúnkwarhiska ka tumina ampe míntakwarhini ka no sési xanhatani, ka ixekuxatiksï máteru wáni no sési úkwa ampe.
Axu México yápuru ísï tsirakwarhixati, jimpoka janonkuxati ya yawakwa, ka juramutiicha Protección Civil anapuecha wantasti éska kw’iripu jánkwarhiaka sési jukachakwarhini ka sési jukant’ani ampe jorhepikwarhininha ka nóksï tsúkua ka júkwa ampe p’irani.
I martes, erakunhant’asti Presidente Estados Unidos anapueni ka éska na mítikwarhika ya Donald Trump antasti. Ka ísï mítiparini Hillary Clinton jeyapinhint’asti éska no antaska, xánk’u wantasti, p’imariparini kw’iripuni éskaksï jurak’uaka éskaTrump juramuaka.
Wánikwa ireta jimpo, wáni kw’iripu latinuecha no jeyapinhint’asti éska inte achaati juramuaka, ka wéakunhasti xanharu jimpo jiwakwarhini éskaksï no jiókwarhisïnka inteni juramutini, jimposï yáasï no sési jánhaskwarhini jati jimini E.U.
Ísï antaparini Donald Trump, dólar sánteru jukaparharasti, karharasti 21 pesu ixu México. Ka jueves jimpo Casa Blancarhu, presidente Obama erokasti Trumpini ka wantontskwarhistiksï. Obama arhisti éska sési pakatperakwa jimpo íntskunt’aaka juramukwani presidenciakweeri.
Derechos Reservados
© Notivideo
© Notivideo