Ari ka ari ampe nitamakwarhisti i semana, wénaparini lunes 23 enero 2017 jimpo.

Por: Alicia Mateo

Éska na mítikwarhika jini Monterrey inte semana, jorhenkwarhiri ma atawasti jorhentpiriimpani ka jorhenkwarhiriichani, ka juramutiicha Nuevo León anapu wantastiksï éska jorhentpiri ka tsimani jorhenkwarhiriicha sánteru sési pikwarheska ya.

Jimposï orhets’ïkuti Secretaría de Educación en el Estado, Alberto Frutis Solís wantasti éskanha íxu Michoacán wenakuarhiska inte ísï arhikata Mochila Segura, inteni jimpo yápuru jorhentpekweecharhu primaria ka secundaria eranhakuasïntiksï jorhenkwarhiriichani ampemintu incharasïnksï, jóperu no yámintu jorhentperakweechani jimpo kurhach’anhasti, nak’i juramukata japka.

Tarímbaronha, ménteru sïpap’iriicha sïpaxapti gasolina ka ísï jimpo kurhup’astiksï ka tsimani mótsitarakweechani k’amap’aani, amposïnha policíeecha nípti ixeni ampemintu úkwarhispi.

Ménteru ari jueves jimpo, CNTE anapu jorhentpiriicha wérastiksï xanharu wantakwarhini éska ts’ïmi no jiókwarhisïnka éska gasolina sánteru jukaparhaaka.

Secretario del Migrante, José Luis Gutiérrez, wantasti éska eratsixakaksï nani na úni, nenka Donald Trump axant’awaka norti niti ánchikwarhiriichani, jimpoka ísï eranhaskwarhixati yáasï nénka ísï wantani jaka jimpanhi juramuti E.U. anapu, jimposï wetarhini jati éska mítiakaksï kwáp’ikwarhini.

Ísï jimpot’u Secretaría de Economía wantasti éska jawaka jarhoap’ekwa énka kwántawaka tuminu inteni énka jaka “Crédito Agíl” jimpo, ka jimininha jarhasti 200 millón peso ka antankwatinha pari kwántani 4 mil kw’iripuechani.

Jini Monterrey Nuevo León, jupikanhasti PRI anapu Rodrigo Medinani PRI anapu énka jintepka gobernadori jimini anapu, ka ónhastiksï jini Topo Chico nénka jamerinha ixekuakaksï ampe no sési úski énka juramutipka.

I semananha Guillermo Padrés énka jintepka gobernador Sonora anapu, énka ónkwarhitini jaka, wénastinha no t’ireni kurhakwarhiparini éska wáp’a énkat’u ónhakata jaka móskunhaaka máteru kataperakwa jimpo jimpokinha p’amenchasïnka, amposï móskunhati ya.

Ari semanat’u Donald Trump sïranta ma xarhatasti ka imani jimpo juramusïnti éska wénakwarhiaka taratanhani jamekwa ka óntakuni México ka nóteru E.U. inchakunhani, ka wantastinha éska yámintu ánchikwarhitani ka ampenka wétarhiaka México mayempiaka, ka Enrique Peña Nieto xánku wantasti éska no ma mayampiaka.

Kurhantekwarhisti i semana éska juramuti México anapu nipirinka Donald Trump jinkoni wantontskwarhini E.U. jóperu Enrique Peña wantasti éska nóteru niwaka, jimpoka mítikwarhiska éska Donald Trump nóteru wekaxapka erokani. Senadoriicha, diputadueecha ka gobernadoriicha winhats’ïtakuxaptiksï éska no nipirinka.

Ford de México wáni tuminu tsitaska sánonha 200 millón dólariichani jimpoka Donald Trump nóteru wékasïnka éskaksï México ánchikwarhiakaksï.

Ari ka ari ampe nitamakwarhisti i semana, wénaparini lunes 23 enero 2017 jimpo.

Autor: Redacción

Autor multimedia: Especial

Autor multimedia: Especial