I ampe nitamakwarhisti i semana énka wénakwarhika 17 jurhitakwa jimpo ka jimani jameri 21...

I semana axu Michoacán autopista XXI jimpo, no sési úkwarhisti, 28 kwiripu warhinhasti, jima tsimani mótistarakweecha watperastiksï, autobús ma ka pipa ma gasolina jatarini. Winhaninha watpersptiksï ka sóntku tixarani ka kurhirani kwipuni énka jima nirani japkaksï. Juramutiicha Guerrero anapuecha wantastiksï éskanha ima énka pánka autobusini xanharu wét’akuspka ka pipani kútamani.

Axu Morelia, juramutiicha turismo anapu wantasti éska 150 mil kwiripu turisteecha jurastiksï Morelia miyuni, ka xarharasti éska júnhaska Semana Santa jampo sánteru wáni kwiripu ka no wéxurhini. Xáni kwiripu jurhani wáni antakwa tuminu jurhak’usti xánisï 190 millón peso, sánteru ka no San Miguel de Allende ka Guanajoto.

I semana éska Maribel Trujillo Díaz, Ciudad Hidalgo anapu, jini Estados Unidos chutanhaska, México kwanhaskunhant’ani ka jurhakuasti t’amu wap’aechani jini Ohio, Maribelinha jini kánkwarhispti wap’achani. Gobernador Michoacán anapuni jinkoni wantontskwarhisti ya ka wantastinha éska jarhoatawaka ixu irent’ani.

Juramukwa Guatemala anapu, jupikasti i semana avier Duarteni, énka jintepka gobernador Veracruz anapu. Jininha jamaxapti jirikwarhini, ka yáasï juramutiicha México anapu kurhakwarhixatiksï éska intsinhant’aka ka juankunhaaka, ka ixu úni tsanpikwa ampe ixekunksï.

Ístunha Tomás Yarrington, énka jintepka gobernador de Tamaulipas anapu, jupikanhasti jini Italia ísï, ka wantanhasïnti éska Estados Unidos kurhakwarhixaka éska Yarrington jini axanhaaka ka jini tsampikwa ixekunksï.

Jini Venezuela wáni kwiripu wéakunhasti xanharu ísï winhachaparini no jeiapinhint’aparini na juramuxaki Nicolás Maduro, ka jima Policíaecha axanhasti kwiripuni kéntitani no wékaparini éska kwiripu winhachakuaka presidenteni. I semana ménteru weakunhasti ka kurhantekwarhisti éska tsimani kwiripu atawaskaksï ka warhinksï, ísï jánhaskwarhini jarhani kurhantekwarhisti ya éska yúmu t’ámu kwiripu warhiska ya. Yápuru ísï anapuecha ixexatiksï na énka jantini jaka jima Venezuela.

Jini España policía jupikawastiksï 39 kwiripu, jimpoka inteecha no sési úraxapka WhatsApp, inteni jimpo etsakwaxaptiksï kwiripueri pitakateechani énka patsiki jásï pitankaksï tataka sapiratiichani ka nanaka sapiratiichani. Ïsï jupiatini inteni kwiripuechani xamant’astiksï inteni xáni no sési kúnkwarhikwani.

I ampe nitamakwarhisti i semana énka wénakwarhika 17 jurhitakwa jimpo ka jimani jameri 21...

Autor: Redacción

Autor multimedia: Especial

Autor multimedia: Especial