Resumen de noticias en Purépecha.
Autor: Redacción
Autor multimedia: Archivo
I semana, ima policía Pedro Cruz Morales énka atakata pakarapka jini Arantepacua, warhistinha tsinap’ikwarhu hospitalirhu, no úsptinha sési pikwarherani. Éska na mítikwarhipka jini Arabntepakwa jupiperanhaspti 5 jurhiakwa abril jimpo ka jimat’u t’ámu kw’iripu warhinhaspti.
Uruapan ka Coahuayana, i semanat’u jwáteecha kurhupisti, ka wantanhasïntinha éska sáno 100 hectárea k’amap’isti. Secretaría de Medio Ambiente, Recursos Naturales y Cambio Climático wantasti éska kurhup’ixaka máteru t’émpini jwáteecha máteru municipio ísï. Juramutiicha kurhakuxati kw’iripuni jwáteechani kwáp’iani ka nirani jarhoap’ini patawani.
Cenobio Moreno, municipio Apatzingán anapu, 117 millón ánchitaxati gobierno jima, mámaru ampe ampantskaxatiksï, xanharuechani, jorhentperakweechani, ch’anaratakweechani ka ísï jarhuani jima anapu kw’iripuni éska sési ánchikwarhiaka ka nóteru jamani jarhani no sési ampe nitakuni.
Wantanhasti i semana, éska Eva Cadena énka candidatapka juramukuekani Las Choapas, Chiapas, xarhatakustiksï éska ewap’eska 500 mil peso, ka wantasti éska jintespka jarhuap’ikwa Andrés Manuel Lópeziriri. Eva Cadenani FEPADErhu pitarkuarhinhasti ya, ka kéntitanhasti ka nóteru úati erakunhani éska juramuti.
Jini Senado de la República, waxastanhasti tsimani jimpanhi juramukweechani Ley General de Desaparición Forzada y Desaparición Cometida por Particulares ka juramukwa Sistema Nacional de Búsqueda de Personas, ka íni juramukweechani jimpo úatiksï jawatani ka wantani Declaratoria Especial de Ausencia, ka inteni jimpo úati xanhatanhani jimak’ani énka ma kw’iripu no xarhant’ani jawaka ka nitamani ya tanimu kutsï, úatiksï kurhakw’arhini íni xásï pakatperakwa.
Ménteru wantasti i semana Donald Trump, ka yáasï wantasti éska nóterunha wémukunt’aka Tratado de Libre Comercio con América del Norte, TLCAN, jimpokanha sési pap’eraxaka México ka Canadani jinkoni. Jóperu wantastit’u éska, éka inte TLCAN no sési marhuakuaka Estados Unidos úati wémukunt’ani.
Jinit’u Texas, Estados Unidos, cámara de representes xanhatasti juramukwa ma énka nóteru jiókwarhiawaka ciudades santuarios arhikateechani, jima énka latinoecha kwáp’ikwarhianka ka nóksï chútanhani. Íni juramukwa jimpo jini Texas ne wéjkini úati chútanhani.
Derechos Reservados
© Notivideo
© Notivideo