Resumen de noticias en Purépecha.
Autor: Redacción
) 
Autor multimedia: Especial
Resumen de noticias en Purépecha.
I semana énka wénakwarhika julio 2017, i ka ari ampe nitamakwarhisti.
I semana énka wénakwarhika julio 2017, i ka ari ampe nitamakwarhisti.
Autor multimedia: Especial
I semana ixu Michoacán káni wantanhiasti k’uiripu, jimpoka jini Apatzingán ísï íntspikwarhikueecha Oxxo arhikata káni no sési nitamakwarhiska. Domigo jimpotki ka miércoles jameri 12 Oxxoecha míkant’astiksï, Secretaría Seguridad Pública estatal wantasti éska tánkwarhinhaska Oxxo orhets’ïkutiichani jinkoni, ka jima wantanhaska éska Seguridad P’ublica jamani jawaka kwáchakuani jarhani, ka cámara video vigilancia jimpo jamani jawati eraxani ka nirani jawatiksï Oxxoechani ixeani.
Oxxo jatsikwarhiriicha, wantastiksï éska yáasï xarharaxaka éska no sési jántixaka jini Tierra caliente ísï, ka orhet’sïkuti Canaco Michoacán anapu Luis Navarro García, sáno wantasti éska eratsixakanha Oxxoechani míkant’ani.
Michoacán winhani janixati jimpoka jamaxaka inte janintserakwa Onda Tropical 10 arhikata, ka xanharuecha jukari no sési jarhurastiksï ya, ísï wantasti Secretario Comunicaciones y Obras Públicas Michoacán anapu, José Juan Domínguez, intet’u wantant’asti éskanha énka na ts’ïminha wenakaksï ánchikwarhini ixestiksï éska xanharuecha no sési xamarhutini jarhaspka sánonha 3 mil 200 kilómetro, ka éskanha 68 % xanharuecha xamakwarhitini jarhaspka ka nónha ampantskanhant’aspti. Wantasti éska 20 % íni xanharuechani jimpo ampatskant’aska ya, jimasï énka sánteru mótsitarakwa jánhajka ka sánteru menanakwarhini ampe.
Jueves jimpo, jini Acapulco Guerrero, katapekwarhu warhiperanhasti, ka 28 kw’iripu warhistiksï ka 5 kw’iripu atakata pakarasti, juramutiicha Guerrero anapuecha, wantasptiksï éska ísku jupiperaspkaksï, ka énka xarhatakaksï nánka xáni wáni kw’iripu warhika mítikwarhisti éska jupiperaskaksï tsimopuru kúnkurhikweecha énka jima wéjkaksï juramukuekani.
Jininha Texcoco, Estado de México, xarhatastiksï i semana námanka jorhentpiri ma kámajka ma jorhenkwarhirini, video jimpo xarharasïnti éska atasïnka. Inte jorhentpiri jima jorhentpekwarhu nóteru niraxati jimpoka orheta ixeatiksï ampe jimpo ísï ataski tataka sapichuni, ka ístu jarhasti máru jorhenkwarhiriicheeri táatiicha énka kwápint’ani jakaksï jimpokanha inte sési ánchikwarhisïnka ka sési jorhentpini.
Jini Venezuela, jima énka jaka Asamblea Nacional, inchanhasti xamap’anksï ka no sési káani diputaduechani énka no Nicolás Maduroni jinkonika, wantanhasïnti éska no sési útsp’iriicha jinteska Maduroeri k’uiripu, ka diputadoechani sïpakuastiksï ka máru diputadoechani atastiksï ka ónhatini jatsiasptiksï. Ts’ïmi diputadoecha énka ísï úkwarhinchaka k’amanharhint’asïnti inteni ampe Maduroni ka inte Presidente wantasti éska no ísïska éska inte no juramuska éska ísï no sési úkwarhipirinka.
I semana, Alemania, wenakwarhisti cumbre G-20eri, ka kw’iripu wérasti winhachani jimpoka nika presidente Estados Unidos anapu, Donal Trump, intet’unha tánkwarhisti Enrique Peña Nietoni jinkoni, ka presidente México anapu wantasti éska nónha wantoskwarhiskaksï watsotakweeri ampe énka wékani jaka tsintsirani Méxiconi óntakwarhini. Peña Nietot’u tánkwarhisti Presente Francia anapuni jinkoni Emanuel Macron ka ístu erokasti Ángela Merkel.
Káni káni Diosï meyamukua énkats’ïni kurhani jaka arini ayemperatani jimpo ka mítini ampe xáni nitamakwarhisïni yápuru ísï.
Derechos Reservados
© Notivideo
© Notivideo