Ampe nitamaski 30 de mayo jimpo ka 3 de junio 2016 jameri

Ari semana Coordinadora Nacional de Trabajadores de la Educación Michoacán anapu werastiksï winhachani éska no jiókwarhisïnkaksï reforma educativa arhikatani, ka jimpoka chutanhani jakaksï jorhentipiriicha jimpokaksï nóksï nirajka ánchikwarhini íni ampe kurhak’uarhiparini.

Ixu Michoacán jorhentpiriicha nirastiksïnha ánchikwarhita jurak´ukuani jorhenkwarhiriichani ka lunesï jimpo míkastiksï presidencias municipaliichani ka martes ka miércoles jimpo wáni jorhentpiriicha wérastiksï xanharanksï kurhakwarhiparini éskaksï kurhachaminhaaka, jóperu CNTE anapucha, sánteru kurhakwarhistiksï jini Nahuátzeni, jimini Gobernador Silvano Aureoles tankwarhisti Concejo Ciudadanoni jinkoni ka wantontskwarhinsï nena sési perant’ani imani warhiperatani énkaksï yóni kamperaaka ya.

Énka nótki wenakwarhianka tánkwarhika máru kw’iripu CNTE anapucha, wekaxantiksï antaparhakuni jima jameri en japka gobernadori, ka policía kwarhukuaxaptiksï. énka anchikwarhiri ma, reportero ma pitanka celular jimpo ka jimani jorhentpiri ma ewak’upka ka ewakorheni, no jiaratani éska eyampint’apirinka éska na jinteeka imeri ánchekorhekwa.

I ánchikwarhiri kurhakuaspti policiaechani eskaksï jarhuatapirinka ka ts’ïma xánku arhijti “énkaksï mítinhakuaka ya, antisïksï antarherajki” ka celularini no intskuminhant’asti ka nit’u nema ampe wantapi ni CNTE anupucha ka ni gobierno anapucha.

Lunes jimpo kw’iripu sésiminu wantanhijti, jimpoka ixenhant’asti warhimitinksï tsimani kw’iripu, ma jintespiti yurhistkiri sapichu énka wantanhapka ya éska tsïnchispka, énka domingo 29 mayo jimpo ka no xarhant’aspka. Yásï jameri Procuraduría General de Justicia nótki mitixatiksï ne ísï wantikwaski yurhitskirichani, ka orhetsikuti José Martín Godoy wantasti éska no yámintu warhiti atakateecha úati wantanhani éska jinteska feminicidio arhikata, najki i yurhitskiriicha Pázcuarho anapucha ixenhant’aka no sési atakata.

Martes jimpo eroparhisti énka juka presidente México anapu, Enrique Peña Nieto puerto Lazaro Cardenas jimpo, ka waxat’ani inte ísï arhikata Ley de Zonas Económicas Especiales, ka inteni jimpo mántani estado énka jaka Pacífico Sur jimpo úatiksï sánteru sésikwa ampe xanhatani.

Miércoles jimpo Morelia, mariachiicha nirastiksï kústapanksï ayuntamientorhu jameri kurhakuarhini éskaksï nóksï móskunhaaka, ísï éska juramuti Morelia anapu wékani jápka, jimaksï kúnkwarhistiksï wáni kút’atiicha ka ísï kút’aparini ka pireparini kurhach’anhasti ka nóksï móskunhaati ka kw’iripu úati jima ixeani mántani churi.

K’amarhutani jamani i semana Medardo Serna González rector Universidad Michoacana anapu wantajti éska anaxustanhaska amaparo arhikata énka xanhatani japka Sindicato Empleadoecheeri, no jayapinhint’aparini éska mítatini jatsipirinka jorhentperakweechani jimpoka xanhatatini jatsiska huelga universidad michoacanarhu.

Jini Ciudad de México ménku útasï tarheata no sési jásïxati erokanhasaanti 120 puntoecha ozono jimpo. Juramutiicha pimarhisaanti kw’iripuni éska jarhoapirinkaksï tarheatani ampakerant’ani ka no ísï no kw’anhaskunt’ani doble no Circula arhikatani, ístu jefe de gobiernos Miguel Ángel Mancera, kurhakusti gobierno federalin éskaksï xanhatant’aaka pre contigencia éka antakuaka 150 puntoechani ka éska mítitiicha wantaaka na xáni IMECAS jameri wétarhisïni pari jinteni contingencia ambiental.

Tamaulipas ka yápuru ísï sésimintu mítikwarhisti námanka nitamakwarhika futbol ch’anari Alán Pulido énka ch’anajka Olympiacos jinkoni, imanha imeeri primuempak’u ka máteru tsimani kwárhukpitiicha júpinhaspti tuminu kurhak’uarhiparini. Imanha jantiok’u jurakutakwarhisti at’apariani tsimani kwárukpitiichani, ka wáni kwiripu no jakak’unhasti.

Jini Chiapas CNTE anapu jorhentpiriicha, wantasïntiksï éska tsima no jintespkaksï énka kwinats’ïkuapka kwímu jorhentpiriichani ts’ïma énkaksï nípka mayampikwa pirani, juramutiicha wantasïnti éska ts’ïma énka ísï pikuaaka mák’u ánchikwarhisïnka, ka jamaxatiksï kurhankwarhini néeski ima kw’iripucha ka únksï pitarkwarhiani SEP wératini ka ístu máteru juramukwarhu ísï.

Ka jini yáwani Japón ísï, tatempeecha tataka sapichuni yúmu tsimani jatiriti, jwátarhuksï jurakuspti xukaparinksï jimpoka no kurhachaspka, ka énkaksï nípka p’ínt’ani no yóni jimpo nóteruksï nani ixent’aspti ka ima tataka sapichu yúmu jurhiatikwa jirinhant’asptiksï ka kwímu jurhitikwa jimpo sési ixent’asti.

Estados Unidos ménteru kurhakuarhint’asti jimpoka jorhenkwarhiti ma jorhentpiriimpani at’aska ima jorhentpiri jorhentpisaanka Universidad Californiarhu, ka tátsikwa ima jorhenkwarhiti jantiok’u atakwarhisti pistola jimpo. Ka políciaecha jimasï jámasti jirhinhant’aani ampe jimpo ísï úkwarhispi. Ka ístu policía Los Angeles anapu, mítitarasti éska ixent’aska ma sïranta énka karhanharhikutini jápka máru kw’íripuecha, ma jintespti warhiti ma énka warhika ka máteru jintespti jorhentpiri énka no nípka ánchikwarhini ima jurhiatikwa énka ísï úkwarhipka.

Ampe nitamaski 30 de mayo jimpo ka 3 de junio 2016 jameri

Autor: Redacción

Autor multimedia: Archivo

Autor multimedia: Archivo